У галаве шмат ідэй? Ёсць жаданне і патрэба навучыцца правільна пісаць і рэалізоўваць праекты? Тады у нас для цябе добрая навіна! Агенцтва рэгіянальнага развіцця “Дзедзіч” запускае “Школу праектнага мэнэджара” для актывістаў_ак і валанцёраў_ак грамадскіх арганізацый з Берасця і вобласці.

Хто можа прыняць удзел?

Узяць удзел у Школе могуць студэнты_кі 4-5 курсаў, якія з’яўляюцца валанцёрамі і валанцёркамі грамадскіх арганізацый Берасця і Берасцейскай вобласці, альбо проста ініцыятыўнымі людзьмі, якія жадаюць навучыцца распрацоўваць і рэалізоўваць уласныя праекты. Усяго навучэнцамі школы стануць 20 чалавек.

— Мы запрашаем студэнтаў 4-5 курсаў, таму што часта ў гэты момант людзі сыходзяць з грамадскай дзейнасці ў дарослае жыццё, — кажа кіраўнік «Школы праектанага мэнэджара» Дзяніс Трацюк. — Мы хочам паказаць, што можна і пасля ўніверсітэта заставацца актыўным, толькі не ў якасці валанцёра, а ўжо на новым узроўні грамадскай актыўнасці. І нават падпрацоўваць у сваёй любімай грамадскай арганізацыі – у статусе праектнага мэнэджэра, які ўмее планаваць, пісаць і рэалізоўваць ўласныя праекты.

Як будзе адбывацца навучанне?

Першая сустрэча ў межах «Школы» пройдзе з 24 па 29 жніўня. На ёй эксперты ў праектным мэнэджмэнце распавядуць, як правільна знайсці і сфармуляваць праблему, вызначыць зацікаўленыя бакі, дзе шукаць прыхільнікаў і партнёраў. Асобая ўвага падчас шасцідзённага інтэнсіву будзе нададзена пытанням напісання праекта, фандрэйзінгу, фармаванню каманды, планаванню дзейнасці. Таксама ўдзельнікі_цы «Школы» навучацца працаваць з валанцёрамі і медыя, маніторыць і ацэньваць вынікі праекта.

Пасля першай сустрэчы ўсе ўдзельнікі_цы атрымаюць заданне, якое будзе заключацца ў напісанні і рэалізацыі міні-праекта. 10 самых цікавых праектаў атрымаюць падтрымку.

На працягу ўсяго этапа рэалізацыі праектаў (верасень-снежань) удзельнікі_цы Школы змогуць кансультавацца з экспертамі па праектным мэнэдмэнце.

А што пасля заканчэння Школы?

Пасля завяршэння «Школы» будзе магчымасць прыняць удзел у конкурсе на лепшы рэалізаваны праект і пазмагацца за каштоўны прыз. Узнагароджанне пераможцаў пройдзе ў святочнай абстаноўцы, з удзелам прадстаўнікоў НДА Берасця і Беларусі.

Калі твае вочы гараць энтузіязмам, а жаданне навучыцца праектнаму мэнэджмэнту б’е праз крайзапаўняй заяўку да 21 жніўня.

Па ўсім пытанням наконт Школы можна звяртацца да Дзяніса: 8029 8010147 (Viber, WhatsApp, Telegram).